Awned for the public benefit

The legal form is the commitment

My Words is awned by C2 Discovery Labs CIC, a community interest company. That's a deliberate structure raither nor a description o intent, an it cairries obligations that an ordinar limited company disna.

1. An asset lock. The assets, includin this product, canna be selt oot o the company for private benefit. If the company is iver wound up, fit it hauds transfers tae anither asset-lockit body wi like purposes, nae tae shareholders.
2. A community interest test. The company his tae satisfy the CIC Regulator that it's cairryin on its activities for the benefit o the community, an file an annual report sayin fit it did.
3. Surplus is reinvestit. Ony surplus gyangs back intae the purpose: biggin the product, eikin oot the leids, an deein the research that shaws fither it warks.

That's the wye the application shiftit. It wis biggit as a proof o concept inside a commercial company, an takkin it intae the CIC pit it far it cudna jist be selt, at the verra pint it startit tae maiter tae the services usin it. The research page covers far it cam fae.

Fowk

Aabody that warks on My Words is peyed abeen the National Living Wage. Naebody warkin on this product is on an unpeyed internship, an the postgraduate research collaborations bein arranged are academic placements wi a supervisor an an output, nae free labour.

Environment

The technical fitprint is smaa far we control it an unmeasured far we dinna, an the detail is on its ain page: environmental fitprint.

Foo we behave commercially

1. Nae lock-in. Ilka plan rins month tae month wi nae minimum term, nae notice period an nae exit fee. A service bides acause the tool earns it.
2. The limits are published. The safeguards page sits wi the product explanation an is linkit fae the footer o ilka page, nae beeriet in the terms of service, an it's written tae be haundit tae staff jist as it stands.
3. Nae invented evidence. We dinna quote accuracy percentages, savins figures or outcome claims that naebody his measured. Far the academic validation produces results that gyang agin us, they get published wi the method attached.
4. We'll argie agin a bad business case. We're nae sales focused. If My Words is a peer fit for fit ye're seekin tae dee, we'll tell ye that, an we'd raither tine the sale nor hae the tool used far it shidna be.

If ye're procurin this, social value covers fit we can evidence agin the Social Value Act, an environmental fitprint covers the technical side. If somethin yer policy needs isna on ony o them, speir for it.