Rinnin a conversation

Afore ye stert

Twa decisions, an baith tak langer tae read aboot nor tae mak.

1. Is this a straichtforrit conversation? If it is, this is the tool for it. If ye're nae shuir, stop an get a qualified interpreter. That's the hale test, an it applies again at ony pint in the conversation far ye stop bein shuir.
2. Some conversations are niver in scope. A statutory assessment, legal advice, clinical consent, a formal safeguardin interview, or onything far a misunnerstaunin wid be haard tae undee. The safeguards page is the full list an it's deliberately conservative.
3. Fit surface? The shared screen if ye're sittin thegither an the subject is ordinar. Their ain device if the subject is sensitive, or if they'd read mair freely wi the screen in their ain haans.

Settin the context

Set the twa leids, an record fit the conversation is aboot afore the first turn: the settin, the situation, fa else is in the room, foo urgent it is. Ye can add tae this at ony pint, an it's wirth deein fan somethin chynges.

This isna administration for its ain sake. Aathing recordit here is in scope for ilka owersettin that follows, an that's the difference atween this an a phone app.

Durin the conversation

1. Ilka body writes in their ain leid. Naither o ye needs tae simplify for the machine. Write the wye ye wid spik.
2. Watch the note aside ilka turn. It tells ye fit the check on that owersettin faund. Far there's nae note, nae score wis produced for that turn: a teem space means unchecked, nae fine.
3. If the tool speirs a question at the ither body, lat it. It dis that fan the source cud mean twa different things, an the question is specific raither nor "please rephrase". Answerin it is quicker nor unpickin a wrang owersettin three turns later.
4. If an owersettin wis revised, ye'll see that it wis. Baith versions bide in the record. Ye dinna need tae dee onything.
5. Check unnerstaunin yersel. Speir at them tae tell ye fit they've unnerstuid, the wye ye wid in ony conversation that maiters. The tool disna tak the place o that an isna designed tae.

Tellin the ither body fit's gaun on

They shid ken a machine owersettin tool is bein used an that they can speir for an interpreter insteid. If they're on their ain device the interface is in their ain leid, sae the explanation wins throwe tae them as weel as the owersettin dis. If a supervisor is present in the conversation, the product tells aabody in it.

Fan tae stop

The test is the same in the middle o a conversation as it wis at the stert: if ye're nae shuir, stop an get a qualified interpreter. Uncertainty is the trigger, an it disna need justifyin.

In practice that means stoppin fan somethin isna landin, fan the body leuks bumbazed by the replies, fan the subject moves intae een o the categories on the safeguards page, or fan ye jist dinna feel confident. Stoppin is a normal outcome an it reflects on naither the tool nor yersel.

The conversations this is biggit for are the straichtforrit eens: the twinty meenits at a front door that wid itherwise be pit aff for want o a leid in common. Clearin thae eens here is fit leaves interpreter time free for the conversations that genuinely need it.

Efterhin

A feenished conversation can be opened again as a read-only record: ilka turn, ilka revision, ilka clarification, an the score attached tae ilka turn at the time. Record the substance in yer ain systems in yer ain wirds, as ye wid wi ony conversation. Yer notes are the record o fit happent; the transcript is evidence o fit the tool did.

If ye're settin this up for a team

Group settins, shared templates, case management, domain knowledge an output styles are configured aince at organisation level raither nor by ilka body separately. Fit ye get covers thae, an gettin startit covers the order tae dee them in.

This guide describes the product as it warks the day. Baith fowk type; speech in an oot is bein biggit. If somethin here disna match fit ye see on the screen, that's wirth tellin us.